Målfattig serieopning - Hjelmeland Idrettslag

Jon-Viggo Andresen har eitt år bak seg som kaptein for seniorlaget til Hjelmeland Idrettslag, og held fram i dette vervet i 2013-sesongen.(Foto: Morten Hetland) — Jon-Viggo Andresen har eitt år bak seg som kaptein for seniorlaget til Hjelmeland Idrettslag, og held fram i dette vervet i 2013-sesongen.
(Foto: Morten Hetland)

I kveld vart det 2-0-tap mot Vaulen 2 for Hjelmeland Idrettslag sitt seniorlag i fotball. Likevel ser 2013-sesongen så langt mykje lysare ut enn fjoråret.

Det var to jamne lag som møttest på Vaulenbanen fredag kveld. Ingen mål vart skåra i 1. omgang, verken av Hjelmeland eller Vaulen 2.

Etter 65 spelte minutt vart det blåst til straffe for Vaulen 2. Då Hjelmeland-målvakt Sveinung Sandvik slengde seg til venstre, fauk ballen elegant inn til høgre for han, og Stavanger-laget tok leiinga.

Elles var det ein jamn og kjedeleg 2. omgang, med unntak av ein episode som enda med at Vaulen-målvakten slo ned Hjelmeland-kaptein Jon-Viggo Andresen. Heldigvis hadde Vaulen-målvakten hanskar på seg, og Andresen var raskt oppe på beina igjen.

Kampens siste mål vart òg signert Vaulen 2 i det 90. minuttet. Sjølv ikkje fire minutt overtid var nok for Hjelmeland-spelarane, som dermed måtte reisa heim med 2-0-tap i årets første seriekamp.